9/7/13

Diad Biskeg Na Agila Untalindeg Ka, O Baley Ko! (A Poem About Aguilar and its People)

9/07/2013



Aguilar


Aguilar was founded as a municipality in July 16, 1805 through a decree issued by Governor General Rafael Maria de Aguilar whom this town was named after.  Local folklores likewise maintained that Aguilar was identified with an eagle or agila that used to fly around the place at nighttime and would perch on a fence or alar when tired of flying, hence, agila and alar put together formed AGUILAR.




LAND AREA: 19,506 hectares
POPULATION: 35,436
NO. OF BARANGAYS: 16
CLASSIFICATION: 3rd class
TOWN FIESTA: 
March 18


PRODUCTS:
Rice, Corn, Vegetable, Taho, Mango, Deremen, Suman,  Luffa
POINTS OF INTEREST: 
St. Joseph Church (1810)
Nambersian
Mapita Trail
World War II Landmark

“DIAD BISKEG NA AGILA UNTALINDEG KA O BALEY KO”

A Poem by Mun. Councilor Rosendo 'Buddy' Fernandez
dedicated to People of Aguilar
Performed by: Ressyl T. Diaz & Allan F. Ocal
during the Annual Town Fiesta of Municipality of Aguilar

RESSYL:  Begbegtew ya mantektekyab so Agilan
Mampapariking tan mamapareen ed tawen
Kalamor ta pipilien, tetegeren tonian
Makadapo, makatuon ed atagey a pasen.


Ta diad sankaatageyan a kiew
Tan sankamaparengan ya palandey
Diman so gabay ton panobongan, paniknolan
Dimay sarag ton pankalemleman, panpusnakan.

ALLAN: No akinet sakey o duaran iknol so ibugis to
Tan alenleneg ya sibong so untanubo
Pinili so agew o panaon tonia
Ta alay dawas, alay talag na agila.

No akinet sikatoy abitlan uliran
Tan aliling to met so tanol tan aliweng
Na sayan baley, a sayan abangonan
Pinablin Aguilar, pinablin nianakan.

RESSYL: Lanti ya say agila et mabiskeg
Untaboy, unsebeg ya manlapo ed tagey
Sibaren tan tekmelan tay bengatlan
Anto man a pinalsa, a saman a getma.

Sali, ulpo, payak iran maseksekder
Tepek, kuko, mata to ran matmatdem
Et no ibuyak ton walay pakanengneng
Nawali ton tampol, baleg o melag, arawi o asingger.

ALLAN:            Diad panduldol a pangipagpag toy daan a bago
Andin kabaliksan toy batik-batik so isip to
No ag ingen panangiwaklit ed daan ya inkatoo
Ta akoen ton untuboy balon inkasaysikato.

Sayan pakapangyari et kabukbukuran
Ed sikaton dilin ang napasungsungan
Ta matalek ton arapey ambelat ton tanyagel
Tan masibeg ton bagbagen so mallet ton beknet.

Ta say bilin day atateng a lanang da itutuktok
Et singa itayo pilak o samay balitok
Ya diad anawet a lanasan, sikatoy pitpiten
Tan diad maliub ya apoy, sikatoy laniagen.

Et sabien ton sabien so suri ton atagey
A singa met ed Aguilan alay biskeg alay putel
Tan ontan met ed Aguilar say pinabli tin Baley
Unsibwal, untekyab, untalindeg, unalagey.

RESSYL: Bangta Aguilar, di amin kalapagan
Diad kalaknabay luyag tin pangipasin
Et walad dilin anlemek mon akwalan
Iray mararakep ya lalaen, nengnengen, sisingeran.

Wadtan iray kakulusay Bayaoas tan Quiray
Wadtan iray kakulusay Sobol tan Cagubay
Makapakelkelaw a batoy Nambersian
Tan ambetel a pasen ed kapalandeyan.

Subol na Bayog, Mankanugkog, tan arum nira
Ilog na Agno, kabangkagan ya agayla
Manangiter na sayaksak so bilay ed uma
Amin ya nanengneng, maka-ay-ayat ira.

Insan no natawagan tilaray
Kinulisep kaiba toy aloton mangga
Inlutod niyog, binanlay
Sapin-sapin tan amayamay nira.

ALLAN: Tan diad isiplog na mauges a dagem
Abeten may paktan mandadalumarem
Unsuba tan umbikwas a singa say agila
Buralen to ray paga, ta isalat toy ligliwa.

Diad biskeg na agila, untalindeg ka Aguilar
Unlukso kay atagey, tan inyabig moy linawam
Makapangyari so kakabatan, maksil a manangiwawan
Mamarandan ed kalat, mamagamor na inawam.

CHORUS:
Suplag ka o baley kon Aguilar
Ta ampere mo ray ambabangil ya kaugsan
Umpan diad saray ilog mo tan kapalandeyan
Wala ray manderal et labay day mananam.

Idepak  mo o baley kon inar-aro
Saray sanduan limam so unyarin begsay
Na maples tan mareen ya baloto
Ya ag balot umbasig ed tunger ya dalanen to.

RESSYL: Mabunan kaalogan, puluwen ed leman
Belas, pising tan siran ag nasabsabaan
Masasanting ya panayaman et aga nasigen-sigen
So bilay ya lay dayew, linis tan deen.

Kumon sarayan impayawan na Amalsa
Et anamoten pian ontan ya mansiansia
Tekeo toy masimuon ya panangidak mumo
Dengan ya unsamit so tuan panangaro


Et no nadusayan bilang irayan tawir a balitok
Gawat tan eras so tawiren na ontombok
Nasimot tan natiguay so yaman a kasiporan
Anggapoy nakera, anggapoy napinabangan

ALLAN: Pinoolan ya palandey, kulos ya dinutak
RESSYL: Manalibukbok ya benget basuran atakatak
ALLAN: Aliguas ya asakda, apuka tan naaliwaleng
RESSYL: Pigpigaray manliket, amayamay so manermen.

ALLAN: Diad panagpopo o panagbatang na kakiewan
Na saray maagom, masamet ed kayamanan
Napapairap tan nanaandi la ray katakelan
Bangta no unuran, biglan danas a manlasid saray kaabongan.

Tan nanaandi met lay sobol ya unagos ed kakulusan
Anggapo met lay kana na saray katanggalan
Et say danum ed gaway kakisiran
Diad saray dumaralos, nayarin sengeg na panpapateyan.

RESSYL: No saray umbaley et manbantay tan manamper
Matuan ag untaluna so getman malimer
Lukasay muling tan ibuyak so mata
Unkinel a singa andawes na agila.

Diad mandama kakabaleyan iran pinabli
Agamilen ed sanduan lima tan isip
So pamaneknek tan pansimbawa
Dian ugagep tayoy untua et nagamoran la.

ALLAN: ugagep tin amin a say baley tin Aguilar
Magmaliw a matalungggaring ed gaway kaabigan
Naoley, umbaley tan pasey panayaman
A sikatoy mumukoten ed gaway kasantingan.

Et no nasabiy taon ya duan libo tan duamplo
Makabat lan ami-amin iray Aguilareño
Magmaliw iran mapulaing, matalino
Masbang, mainawa, makuli tan mapangaro

CHORUS:
Ibuat tila sirin kaderleng iran kabaleyan
Pantatabinan tan pankakasakeyan
Iray binuknol, tinugyop tan tinibukel
Ya taganoey isip tan taganoey banikel

RESSYL: Aglin ballot sasaewen a bantayan
So panangikurang na abitlan kayamanan
Agtin ballot desyangen, dutaken panuleyan
Inap-apiger ya oley, sinimsimpitan a kaban

Ey la kumon sarag tin arapen so sabilao
Ta marunong tayon umpaliis ed segsegang
Manlapo lad natan, iter so tuan panangampopo
Ed inter na Dios iran sipor a yaman.

ALLAN: Agtin ballot lilingwanan irayan mallet a bonikew
Ta no pantikleban tan igegep ed kanunotan
A diad ikurang na panoen ed untumbok  iran agew
Ag balet mangumpang so biskeg ya idadayew.

Diad biskeg na agila, talindeg ka Aguilareño
Paneknekan mo ed amin iran bekta
Ya agmon ballot ilako o saman ya isalat
So baley mon pinabli ed kuarta o pilak.

CHORUS:
Baley mi diad santing mo anggapoy miulibay
Aguilar o baley mi aroen mikan agayagay
Diad kapuspusoan mi sikay niduma-duma
Lawas sikay panlingkuran mi natan ya anggad angga

TALINDEG KA AGUILAR,
ED BISKEG NA AGILA.




Your thoughts about this post? Leave a commment now.

Posted by

AndyFGo : A place for Pinoy Music News. MP3 and Album Downloads. Lyrics. Music Videos. Pinoy Movie Trailers. OPM Downloads.

 

© 2013 andyfgo. All rights reserved. Designed by Templateism. Powered by Blogger
Protected by Copyscape DMCA Takedown Notice Violation Search

Back To Top